Këshilli Kombëtar i Radio Televizioneve i tërheq veshin Arian Çanit, autorit e moderatorit të emisionit Zonë e Lirë. Sipas një shkrese që mban datën 2 dhjetor 2011 KKRT njofton se pas ankesës së disa qytetarëve,

në vizionimin e emisionit të datës 25 nëntor 2011 janë cenuar rëndë të drejtat e normat morale dhe etike të komunikimit televiziv. Pikërisht këtë ditë, Arian Çani kishte ftuar në emisionin e tij Zonë e Lirë, Katjushan 23 vjeçare nga Ukraina, e cila punon si DJ Topless.

Pas një interviste ku bukuroshja rrëfeu se ishte bija e një gjenerali ushtrie dhe arsyet pse dashuronte këtë profesion, performanca e saj topless duket se ka sjellë edhe reagimin e KKRT-së. Sipas institucionit, përmbajtja, pamjet, koha e transmetimit, gjuha, gjestet dhe fjalori i përdorur në një pjesë të konsiderueshme të këtij emisioni cënojnë të drejtat, edukimin dhe shëndetin moral e mendor të fëmijëve dhe moshave të reja. Pas vërejtjeve drejtuar moderatorit Arian Çani, ai ka reaguar në formë cinizmi.