Shqetësimi i saj në ditët kur ka qenë në shtëpi ishte shëndeti i nënës së saj. Edhe pse këtë merak e mbajti mëse të fshehtë, tashmë që ka fituar 100 milionët e vendit të parë, të edicionit të 4-t të "Big Brother”, rrëfen se ato para do të shkojnë për shëndetin e nënës së saj.

 

Më tej, nevoja immediate e familjes së Ermelës është shtëpia. E vetëm nëse do t’i teprojë ndonjë lekë, ajo do të blejë edhe një palë sandale! Ndërsa përsa i përket Ervinit, dhe marrëdhënies me të, Ermela pohon se do t’ia lërë në dorë kohës ecurinë e kësaj lidhjeje...

Ermela, tani jeni fituese por sa e keni dëshiruar çmimin e parë? Dhe ju lumturon më shumë fakti që i sfidove të gjithë, kur dihet që, sidomos javët e para, ishe më e nominuara? Të fitoja çmimin e madh ka qenë një nga arsyet kryesore që unë kam hyrë në "Big Brother”. Se, më tepër sesa e doja, mua më duhej. Dhe inati për të ecur përpara dhe për ta çuar Big-un deri në fund, ka nisur nga java në javë. Veten duke e parë veten në nominim, në të gjitha herët ose jo, unë ju dhashë të gjithëve mundësinë për të më njohur dhe them si ka mundësi që thonë akoma nuk e njohim.

 

Ky mendoj se është problemi i atyre, unë thjesht dua të them se kam marrë votat e publikut dhe unë me ta komunikoj, ndërsa brenda jua ktheva përgjigjen me radhë të gjithëve. Dua të them diçka, për t’u bërë e famshme nuk më ka interesuar për asnjë moment. Nuk është se jam shumë e dhënë pas ekranit e fotove, sigurisht të bëj foto për veten time kam qejf, por jo të jem e famshme, e të dal të nxjerr dhëmbët të bëj si e qeshur dhe e lumtur.

Çmimin thatë se ju duhej dhe ju duhet për shërimin e nënës suaj. Por është fakt që nuk e keni përmendur shumë nënën në shtëpi. Përse?

Unë jetoj me shtëpi me qira prej shumë kohësh. Kemi punuar të tria motrat, babi që është pensionist, mami nuk ka punuar sepse nuk ka pasur mundësi, dhe të gjitha rrogat tona shkonin për mure shtëpie, për qira, një nga problemet më të mëdha që duhej zgjidhur. Operacioni i mamit sa fillon dhe është bërë më i vështirë, pasi mami ka 7 sëmundje, alergjike, me zemër, diabet, 11 gurë në thëmth, etj, i ka të gjitha në trup.

Këto para do të shërbejnë posaçërisht për shëndetin e mamit?

Absolutisht, është gjëja e parë. Unë mezi po pres që t’i marr dhe gjëja e parë që do bëj është operacioni i mamit.

Ajo vetë, si ka reaguar për fitoren tënde?

Mami ka një natyrë, që nuk e shfaq shumë entuziazmin e madh, e mban përbrenda. Dhe kjo i jep edhe ato shqetësimet trupore që ka.

Po reagimi i babit, i cili edhe nuk ka qenë dakord që ju të hynit në ‘Big Brother’?

Kur e kam parë me lot në sy, jam prekur. I duket vetja i famshëm, gëzon ai më shumë se unë (qesh). Ju betohem, që gëzon ai më shumë se unë.

Po ngaqë nuk ju ka mbështetur në fillim dhe është gëzuar që keni dalë fituese?

Për fituese nuk e di, unë vetë akoma nuk e di akoma që kam fituar. Nuk më besohet në asnjë moment. Së pari, po përpiqem ta marr veten se nuk kam qenë mirë, as me oreksin, as me gjumin, më është çorientuar komplet sistemi i regjimit.

Cili është veprimi i parë që do të bëni, sapo të merrni paratë?

I pari është të operoj mamin, dhe pastaj të shoh të blej ndonjë shtëpi. Dhe ja mbaruan lekët. Po tepruan do blej dhe një palë sandale për vete.

Ermela, në media është përfolur se një nga motrat e tua, që nuk ka qenë aspak prezent gjatë kësaj kohe, sikundër motra tjetër, ndodhet në burg…

Është përfolur jo pak. Unë çfarë nuk kam dëgjuar nga gazetat; që unë jam epileptike, e sëmurë, etj, nuk di të them. Por fantazia në këtë rast nuk ka pasur lidhje me realitetin. Motra ime është fejuar në Greqi, se nuk është shfaqur, kjo nuk do të thotë se nuk ekziston. Një problem i tillë ka qenë para se unë të hyja në shtëpinë e ‘Big Brother’, por ka qenë thjesht një verifikim. Ka qenë e ndaluar, ka dhënë shpjegimet e veta për gjithë keqkuptimet, është një procedurë e mbaruar, punë e zgjidhur. Sinqerisht më vjen shumë keq kur dëgjoj gënjeshtra të bëra mal.

Ermela, megjithatë tani je fituese, por a të shqetësojnë gjërat që kanë dalë për jetën tënde dhe familjen, kur ke qenë në shtëpi?

Për momentin nuk më shqetëson çfarë është thënë, se jam ende në atë vorbullën e tensioneve brenda, Ermela që zihet e debaton, çfarë nuk kam dëgjuar për veten time, nuk më bën përshtypje për momentin.

Përsa i përket Ervinit, ai gjatë gjithë kohës që ke qenë në shtëpi ka luftuar për ty dhe gjithmonë ka pohuar se ti do të ishe fituesja. Të ka entuziazmuar fakti që të ka pritur dhe si e sheh në vazhdimësi marrëdhënien me të?

As që bëhet fjalë që më ka lumturuar. Më ka lumturuar jashtë mase, por unë jam një femër që kërkoj akoma më shumë. Ja kam lënë gjërat në dorë kohës, mundësinë po ja jap për të më njohur dhe për ta njohur, por pastaj duke parë e duke bërë.

Ervini nga ana tjetër, i ka bërë një lloj "publiciteti” vetes, duke u shfaqur edhe nudo në një gazetë. Ju ka bezdisur ky fakt kur e mësuat?

Unë i thashë; ti dil kështu, por paç çfarë me nxjerr!

Brenda në shtëpi, sa e vështirë ka qenë për ju të dy të bënit marrëdhënie seksuale?

Të kryesh marrëdhënie seksuale me 20 veta rreth e rrotull, është një gjë e pamundur. Të tentosh të bësh është gjë tjetër.

Kjo do të thotë se marrëdhënia juaj ka ngelur në tentativë?

Po, ka qenë vetëm tentativë. Nuk të linte njeri të bëje ndonjë gjë edhe sikur të doje (qesh). Sapo fikeshin dritat në darkë, Jonela na hipte mbi krevat dhe na ngacmonte "çfarë po bëni ju të dy… o bo bo bo…?”.

Ermela, keni thënë se konkurrente më të fortë shihnit Nedën, u çliruat kur ajo doli nga loja?

Duhet ta theksoj se e shikoja vetëm dy-tre javët e para. Absolutisht më vonë. Ta quaja Nedën konkurrente aq të fortë, do isha marrë me të që në fillim.

Tani që je jashtë shtëpisë, si po i përjeton këto ditë?

E marr Ervinin qëparë në telefon dhe i thashë "Ervino ku janë ata të shtëpisë?”. Ai më pyet, "kush të shtëpisë sime?”, jo mor jo, i thashë, ata të shtëpisë sonë, për banorët. Më ka marrë malli vërtet, më besoni. Më mungojnë. Të gjithë. Edhe pse jemi zënë e kemi bërë debate, ju betohem që më ka marrë malli. As që i mbaj inat asnjërit. Në një farë mënyre, të betohem, që thellë-thellë i kam dashur të gjithë. Janë njerëz, të gjithë kanë pasur diçka pozitive, por thjesht aty nuk duhet të tregoheshe e mirë, aty duhet të tregoheshe e mirë ti vetë dhe t’u nxirrje dhe vije në pah të tjerëve të keqen. Kjo ka qenë loja. Nëse në një moment, dikujt t’i vije në pah të mirën që kishte, aty humbisje nga loja.

Ka ndonjë debat, ku mendon se ke gabuar në mënyrën si ke reaguar?

I vetmi debat do të thosha ka qenë ai me Hënesin, pasi ende nuk kisha kuptuar se çfarë ishte loja. Faleminderit Hënes, që më mësove që në 24 orët e para se si ishte loja dhe turp për atë debat të shëmtuar që ke bërë!

Petriti ka qenë gjithashtu, një banor që ju ka fyer, je përshëndetur me të kur ke dalë?

E kam klasifikuar si një nga personat më ordinerë, si shtresa më e ulët e llumit që jeton! Dhe po të merresh me atë lloj shtrese, lyhesh dhe vetë, ndaj nuk jam marrë fare me të.

Një personazh me të cilin ke debatuar jo pak, është Ogreni. Cili është mendimi që keni për të tashmë që nuk jeni më në garë?

Ogreni do ishte deri në fund djalë i mirë, po të mos ishte lidhur me Nedën. Aty humbi lojën.
Pse, çfarë mendoni konkretisht për Nedën?

Është një femër e pazhvilluar, që gënjen veten me një fantazi që është jashtë realitetit ku ekzistojmë.

Ervini ka pohuar se të ka porositur edhe një unazë, çka do të thotë se po i avancon pak mendimet dhe dëshirat me ty?

Mesa më ka thënë Ervini, kjo puna e unazës është një shpikje e Algenit dhe Torrosit. Por duke qenë se ka thashetheme më të mëdha për VIP-at e vërtetë, nuk shqetësohem. Unë thjesht ata që përhapin fjalë të tilla do t’i nominoj (qesh).

Ke ndenjur mjaftueshëm këto ditë me Ervinin? Je çmallur me të?

Aq sa kemi pasur mundësi, po. Kemi ndenjur thuajse gjithë ditën bashkë.

Po tentativën e lënë për gjysmë në shtëpi e keni ezauruar?

(Qesh) Jo. Nuk kemi pasur kohë ende! Megjithatë të rrish tre muaj brenda, të vete në majë të kokës. Dil njëri me të brendshme, dil tjetri dhe çfarë të jesh, të mos të të shkojë në mend (qesh). Po ka kohë për të bërë dashuri me Ervinin, këtu jemi tani!