Është kaq i papërmasë përdorimi i Facebook-ut saqë argëtimi që vjen duket se të hipnotizon. Nëpërmjet kësaj faqeje të internetit mund të ritakohesh me miqtë e fëmijërisë, mund të ruash lidhje të largëta,

 

të informohesh mbi shkolla apo profile mediatike. Komentet dhe fotot e përdorura në këtë faqe janë pjesa më e veçantë që duket se i mban të gjithë kaq të lidhur e besnikë.

Të rinjtë tanë janë shumë të dhënë pas Facebook-ut, madje disa prej tyre thonë ta kenë bërë pjesë të rutinës ditore. Festina Sejdiu është njëra ndër të shumtat e vajzave të reja, e cila kalon orë të tëra në Facebook."Facebook-u tanimë është në trend, thuajse çdo njeri ka adresë në këtë faqe. Kjo faqe e internetit është mënyra më e mirë për të kontaktuar, për t’i gjetur shoqërinë dhe të afërmit, por edhe të njihesh me shumë njerëz të tjerë, me të cilët mund edhe të miqësohesh”, thotë ajo.

Përveç kësaj me anë të Facebook-ut shumë të rinj kanë arritur të kenë edhe lidhje dashurie. Këtë e pohon edhe Vjollca Çitaku, prishtinasja e cila tani e 9 muaj vazhdon të mbajë lidhjen e saj të dashurisë.
"Është e vërtetë që me anë të internetit gjegjësisht në Facebook unë kam takuar princin e ëndrrave të mia, me të cilin jam tani e nëntë muaj. Të them të drejtën në fillim nuk kam menduar se do të gjej djaloshin tim në internet, por ja që ndodhi dhe jam shumë e lumtur”, thotë ajo. E dhënë pas Facebook-ut është edhe Valmira Sylejmani e cila përveç kontakteve me shoqërinë ajo arrin të zhvillojë edhe më shumë profesionin e saj të modelimit dhe të këngës.

"Facebook-u jo vetëm që më sjell argëtim me shoqërinë, në një mënyrë edhe më ndihmon të zhvilloj karrierën time të modelimit dhe këngës. Nëpërmjet kësaj faqeje të internetit unë kam arritur të marrë pjesë në disa koncerte, të njihem me shtëpitë e modës dhe kompani të fotografisë ku edhe jam bërë pjesë e tyre”, thekson ajo.
Lidhje të shumta në Facebook ka krijuar edhe i riu Bajram Bajrami, i cili këtë faqe të internetit e quan zbavitje dhe kënaqësi.
"Facebook më sjell kënaqësi, përveç kontakteve me shoqet dhe shokët unë jam njohur edhe me shumë miq të rinj. Tani në adresën time kam më se 600 persona dhe thuajse me të gjithë kam kontakte. Më pëlqen të kaloj kohën e lirë në Facebook, tani kam përshtypjen se nuk mund të rri pa të”, shton ai.
Facebook-u, aq i mirë por edhe i dëmshëm
Nëse do të bëhej një sondazh mbi numrin e personave që përdorin Facebook-un shifrat nuk do të ishin të konsiderueshme, por të pafundme. Sipas sociologut Arsim Rexhepi, do të ishte pohimi më real dhe i vërtetë një fakt për sa i përket Facebook-ut që ka pushtuar dëshirat e çdokujt.
"Pyetja e parë që bëhet mes dy miqve apo edhe të saponjohurve është "ke Facebook?. Sepse mania për të pasur sa më shumë miq e të njohur induktohet në mënyrën më të pandërgjegjshme nga kjo dritare. Facebook-u është dritarja që të krijon mënyrën më të thjeshtë për të pasur shokë e miq qofshin këta të njohur apo të panjohur. A ia vlen të rrish me orë të tëra përpara saj? Obsesioni që krijohet nga përdorimi i tij është kaq i madh dhe i pakuptueshëm sa që bën të mundur krijimin e një perdeje të verbër për të mos parë disavantazhet e tij. Orë të tëra të shpenzuara përpara tij të bëjnë të mos kuptosh rëndësinë e gjërave të tjera, të cilat janë më se të domosdoshme për t’u bërë. Varësia që krijohet, koha e humbur, që në fakt nuk ka aq peshë, janë rreziqe që na vijnë pa i kuptuar. Pamundësia për të kontrolluar të tjerët të cilët mund të vjedhin informacione personale, apo falsifikimi i profileve të rreme janë po ashtu anë të errëta të medaljes. Foto dhe komente vijnë pafund dhe privatësia që do të doje është brishtësuar. Facebook-u sjell kënaqësi, por krijon edhe probleme që të lodhin e të bëjnë të pyesësh ‘Ia vlen ta përdorësh kaq?’”, shprehet Rexhepi.
Pra Facebook-u sa i mirë por edhe i dëmshëm për pjesën dërmuese të njerëzve, mirëpo sido që të jetë duhet të dish edhe kohën e qëndrimit në të, e jo të humbësh orë të tëra pranë kompjuterit.