Edor Kabashi ka identifikuar gjenin përgjegjës për çrregullimet neuromuskulare. 31-vjeçari, i kërkuar nga qarqet shkencore botërore. Një 31-vjeçar nga Durrësi ka arritur të bëhet pjesë e ekipeve më të njohura të shkencëtarëve franko-kanadezë, duke zgjuar interesimin e tyre për vetë kapacitetin e tij.

 

Zbulimi i të riut nga Shqipëria ka ardhur pasi agjencia amerikane e lajmeve, UPI (United Press International) dhe mediat kanadeze raportuan në mbarë globin nga Montreali se "një ekip shkencëtarësh kanadezë dhe francezë kanë identifikuar një gjen të tipit të ri, përgjegjës për një fraksion të shënueshëm të rasteve të ALS-së (amyotrophic lateral sclerosis – skleroza laterale amiotrofike)”.

 

Sipas lajmit shkencor, "ALS zakonisht quhet edhe sëmundja e "Lon Gehrig-ut”, një çrregullim neuromuskular i pashërueshëm, që dëmton neuronet motore dhe çon në paralizë ose vdekje brenda 1-5 vjetësh. Lajmi është botuar në edicionin e muajit mars 2010 të revistës "Nature Genetics”, ku studimi i mbi 200 subjekteve njerëzore me ALS u udhëhoq nga doktorët Gi Rulo (Guy Rouleau), durrsaku Edor Kabashi, Pol (Paul) Valdmanis të Qendrës Kërkimore CRCHUM (Centre Hospitalier de l’Université de Montréal – Qendra Spitalore e Universitetit të Montrealit).

 

Ekipi shkencëtarëve ka identifikuar disa mutacione gjenetike në gjenin TDP-43, me anë të studimit të pacientëve me ALS nga Franca dhe Kebeku . Pas verifikimeve shkencore, ata vërtetuan se TDP-43 është gjeni përgjegjës për rritjen deri në 5 për qind të numrit të pacientëve të prekur nga ALS. Zbulimi i madh (breakthrough) është rezultat i një pune në ekip me kolegë të barabartë për nivelin që kanë nga universitetet e Waterloo dhe Laval në Kanada, Federata e Sëmundjeve të Sistemit Nervor dhe Instituti i Biologjisë në Francë.

 

"Sipas shkencëtarëve, identifikimi i mutacioneve shtesë në TDP-43 në pacientë të tjerë me ALS do të vërtetojë se ky gjen është shkak i dukshëm i këtij tipi çrregullimi”. Në krah të dr. Rulo, drejtor i qendrës kërkimore të spitalit "Sainte-Justine” ndodhej në çdo çast edhe durrsaku 31-vjeçar, fenomeni Edor Kabashi, sipas përfundimit shkencor, "modelet animale, që tejshprehin mutacionet e identifikuara në këtë studim do të sigurojnë pamjen vendimtare në brendësi se si TDP-43 grumbullon dhe vret më në fund neuronet motore”. Ky zbulim është një hap drejt zhvillimit të terapive për njerëzit, që vuajnë nga kjo sëmundje e tmerrshme, po ashtu ka gjasa dhe për sëmundje të tjera neurodegjenerative”, – shprehet fenomeni durrsak me titullin e lartë dr. Kabashi i cituar nga mediat ndërkombëtare.