Ogreni u rendit i treti mes finalistëve të "Big Brother 4”. Nuk e arriti fitoren, por thotë se brenda shtëpisë tregoi të gjitha karakteristikat e një fituesi.

 

Ogreni tregon se e priste që Ermela të merrte çmimin e madh, ndonëse shprehet i bindur se ishte ai që e meritonte. Për lidhjen me Nedën, thotë se ka shumë ndjenjë dhe do të vazhdojnë edhe jashtë shtëpisë.

Arrite finalen, por jo çmimin e madh. Të erdhi keq, u ndjeve i zhgënjyer? Nuk më erdhi keq për asgjë. Spektakli ishte ndërtuar në mënyrë të atillë që na bëri të ndiheshim mirë. E shijova mbrëmjen e së shtunës. Pavarësisht gjithë karakteristikave që kisha treguar atje prej fituesi, pavarësisht se unë mendoja se e meritoja, kisha bindjet e mia që vinin si pasojë e disa të dhënave të caktuara që kisha marrë së paku dy muajt e fundit që unë nuk do e fitoja këtë edicion për arsye nga më të ndryshmet. Ndaj e kisha përgatitur veten mirë që kjo lojë do të shkonte kështu siç shkoi.

E prisje Ermelën fituese?E kisha thënë gjithmonë dhe ia thosha edhe Ermelës në shtëpi që të mos mërzitej se do e fitonte "Big Brother”. Në atë pak reagim që ne merrnim me botën jashtë, shihej qartë se si do të shkonte rrjedha e këtij spektakli. Për mua ishte fitore që i shijova të 100 ditët brenda shtëpisë.

Me cilin nga banorët ishte sfida jote?

Nëse do duhet të zgjidhja do të thosha për Ermelën. Luftoi me mish e me thua deri në fund. Për potencialin që kam dhe ashtu siç e konsideroj veten, nuk kisha një konkurrent të fortë dhe të rrezikshëm. Ermela ishte ajo që arrinte të përdorte çdo gjë të lejueshme dhe jo të lejueshme.

Si i ke përjetuar orët e para jashtë shtëpisë?

Orët e para ishin një ëndërr e bukur. Surpriza që u organizua në shtëpi me Nedën ishte e mrekullueshme. Pamja e saj, mënyra si ishte, fjalët që më tha, më përcolli energji pozitive. Festuam fillimisht me fansat tanë që ishin të shumtë në numër dhe që kishin organizuar festë në një lokal, pastaj iu bashkuam të tjerëve.

Sa të predispozuar jeni ju për ta vazhduar lidhjen tuaj edhe jashtë?

Kemi dëshirën, vullnetin, por më shumë kemi ndjenjën. Ne duhet të njihemi në situata të veçanta që të përball jeta e përditshme. Sigurisht që në tre muaj bashkëjetesë e kemi njohur njëri-tjetrin në detaje për të cilat jashtë do të ishte dashur shumë kohë.

U duk sikur t’i i shprehe ndjenjat për Nedën vetëm pasi ajo doli nga shtëpia?

Unë jam një person sa i fortë aq edhe i ndjeshëm për gjëra të caktuara dhe shumë të shtrenjta si dashuria, familja. Në momentin që një prej këtyre vlerave u prek, pa asnjë lloj kompleksi tregova ndjeshmëritë e mia.

Do të doje të kishe bërë diçka ndryshe në "Big Brother”?

Absolutisht asgjë. Nuk kam pishmane, kam dhënë gjithçka nga vetja ime. Jam i kënaqur me këtë eksperiencë dhe këtë bindje e kisha përpara se të hyja në lojë dhe e kam të konfirmuar sidomos pas pritjes që më bëri publiku kur dola nga shtëpia.