Luan Krasniqi nuk e ka ndërmend të pensionohet. Boksieri kosovar ka paralajmëruar rikthimin në ring, pas dy vjetësh pauzë. Ai ndihet i motivuar dhe dëshiron ta sprovojë veten edhe një herë, në shkurt të vitit 2011.

 

Për shumëkënd, karriera e Luan Krasniqit në boks ka marrë fund. Por kështu nuk mendon boksieri kosovar me pasaportë gjermane, i cili po planifikon t’i rikthehet ringut, pas dy vjetësh pauzë.

Boksieri i lindur në Junik i ka thënë tabloidit gjerman, Bild se po përgatitet që t’i kryqëzojë dorëzat sërish, pasi ndien se ende mund t’i japë këtij sporti, edhe pse aktualisht ka mbushur plot 39 vjet."Kam fituar fuqi të çmendur dhe energji. Dëshiroj të provoj përsëri”, ka thënë boksieri me pasaportë gjermane.

Këshilltari i tij, avokati i njohur, Christoph Schickhardt, e ka konfirmuar lajmin. "Po punojmë që t’ia garantojmë Luanit që të boksojë sërish. Ky rast mund të ndodhë fare lehtë”, deklaroi 55- vjeçari gjerman.

Rikthimi i Krasniqit në ring pritet të ndodh në muajin shkurt të vitit të ardhshëm, në Ludwigsburg Arena. Ai e ka një ëndërr. "Një meç në shtëpi do të ishte gjithmonë i bukur”, vazhdoi Krasniqi.

Lufta e fundit e boksierit me prejardhje nga Juniku ishte ajo e 15 nëntorit të vitit 2008, ndaj ukrainasit Alexander Dimitrenko, të cilën e humbi me nokaut teknik.

Pas asaj kohe, Luani kishte planifikuar rikthimin disa herë, por kishte dështuar. Njëra nga arsyet ishte lëndimi i pësuar në ligamentet e nyjës së këmbës së djathtë, që kishin detyruar kosovarin ta anulojë revanshin e shumëpritur me Alexander Dimitrenkon, që ishte paraparë të zhvillohej më 28 nëntor të vitit 2009.

Në këtë përudhë, boksieri kosovar, edhe pse nuk i ka kryqëzuar dorëzat, ishte afër ringut, pasi e kemi parë shpesh në rolin e komentatorit dhe analistit të meçeve të boksierëve të njohur botërorë.

Tash, kjo është tentativa e fundit. Do të jetë meçi i 36-të në boksin profesionist. Pa dyshim, rasti i fundit.