Michael Schumacher është rikthyer përfundimisht në Formula 1. Shtatë herë kampioni i botës do t’i rikthehet pistës në sezonin 2010 me ekipin gjerman Mercedes GP.

 

Të dyja palët kanë arritur marrëveshje njëvjeçare, kurse piloti gjerman do t’i përfitojë 7 milionë euro. 40 vjeçari thotë se pas tri vjetësh pauze, i është rikthyer e gjithë energjia dhe premton se do të jetë i suksesshëm.

 

Mungonte vetëm zyrtarizimi, e të mërkurën ka arritur edhe ai: pas 1239 ditësh pauze, Michael Schumacher, i cili do t’i mbushë 41 vjet me 3 janar, në sezonin 2010 do t’u rikthehet garave të Formula 1. Këtë nuk do të bëjë me Ferrarin, por me Mercedes, bashkë me bashkëkombësin Nico Rosberg.

Këtë lajm e kishte paralajmëruar tabloidi gjerman Bild të martën mbrëma, por tashmë është zyrtare. Shtatë herë kampioni i botës në Formula 1, Schumi, ka nënshkruar me ekipin e ri Mercedes GP në Brackley të Anglisë një kontratë njëvjeçare. Sipas Bild, nga kjo kontratë ai do t’i përfitojë 7 milionë euro.

Të mërkurën në mëngjes, e gjithë Gjermani ishte ngritur në këmbë dhe temë kryesore atje ishte rikthimi i madh i Michael Schumacher n Formula 1 me ekipin Mercedes. Që nga viti 1955, një pilot gjerman nuk garonte për ekipin Mercedes GP. Michael do të punojë bashkë me Ross Brawn, me të cilin kishte fituar shtatë titujt në karrierë.

"Tri vjet mungese ma kanë rikthyer gjithë energjinë dhe tash ndihem në top. Ndihem i gatshëm për gjithçka serioze dhe mendoj se do të jem absolutisht i suksesshëm”, ka thënë Schumacher. Në të njëjtën kohë, Mercedes ka komunikuar se është arritur marrëveshja me pilotin gjerman.

Piloti gjerman ndërkaq ka njoftuar se nuk ndien më probleme me qafën, pas një incidenti që kishte me motor, i cili ia pamundësoi rikthimin në Formula 1 sezonin e kaluar, për ta zëvendësuar, siç planifikonte, Felipe Massan, që kishte pësuar një incident të pazakontë. "Qafa nuk është më faktori që duhet të merret në konsideratë”, ka thënë në fund Michael Schumacher.