 Rebel a.k.a Unikkatil, rap artisti i njohur dhe i adhuruar nga të
gjithë të rinjtë shqiptarë, do të performojë në Prishtinë. Kompania
Powow Entertainment bëri të ditur se do të organizojë një festival të
muzikës,
ku do të performojë Unikkatil, ndërsa emrat tjerë që do të
performojnë në këtë festival do të bëhen të ditur gjatë ditëve në vijim.Rap këngëtari i njohur shqiptar Viktor Palokaj, i njohur si
Rebel a.k.a Unikkatil do të performojë në Prishtinë.
Lajmin e bëri të
ditur kompania Powow Entertainment, e cila do ta sjellë në Prishtinë
artistin shqiptar që jeton në SHBA.Kjo kompani, e krijuar gjatë
vitit të kaluar, aktivitetin e parë që e organizoi ishte koncerti i The
Game, që u mbajt në sallën ‘1 tetori’ e që i mblodhi mijëra adhurues të
muzikës rap, të cilët u ndanë të kënaqur me organizimin dhe me
performimin e këngëtarëve. Rap këngëtarit shqiptar, Unikkatil, i
cili e revolucionarizoi muzikën rap jo vetëm në Kosovë por edhe në
gjithë hapësirat shqiptare, dhe i cili është mjaft i kërkuar nga
adhuruesit e kësaj muzike, kompania Powow Entertainment ia kishte vënë
syrin muaj më parë, por deri më tani nuk kishte arritur të bëjë ndonjë
marrëveshje me të. Por, kërkesat e mëdha si nga kompania po ashtu edhe
nga adhuruesit e Unikkatilit, si duket, ia kanë ‘thyer’ zemrën dhe ia
kanë ndërruar mendjen atij. Të dielën, në faqen e sa në Facebook,
kompania Powow Entertainment deklaroi se ka kënaqësinë t’i njoftojë
adhuruesit e muzikës rap se në Prishtinë do ta sjellë një rap këngëtar
shumë të njohur e shumë të kërkuar. "Ata që e përcollën koncertin
e The Game në Prishtinë tashmë e kanë të qartë se kompania Powow
Entertainment nuk i zhgënjen adhuruesit e muzikës. Kënaqësia jonë është
më e madhe me faktin se ky artist që do të performojë në Prishtinë është
shqiptar dhe emri i tij njihet nga të gjithë. Ai është Unikkatil”,
thuhet në lajmërimin e kompanisë, i bërë në faqen zyrtare në Facebook.
Sipas kësaj kompanie, Unikkatil është definitivisht artisti më i kërkuar
shqiptar në botë. "Vet fakti që ka refuzuar 15 oferta deri më
tash tregon se sa i kërkuar është. Powow Entertainment si kompani që nuk
i zhgënjen adhuruesit e muzikës, pas shumë përpjekjesh dhe negociatash,
ka arritur që ta bindë rap këngëtarin shqiptar për të performuar, për
herë të parë, në Kosovë”, thuhet në këtë komunikatë. Por kjo nuk
është e tëra. Risitë që kjo kompani do të sjellë për publikun kosovar
nuk mbarojnë me kaq. Ata bëjnë të ditur se gjatë këtij viti do të
organizojnë një festival muzikor në Prishtinë, ku do të performojnë edhe
artistë të tjerë, por nuk kanë bërë të ditur emra të tjerë përpos
Unikkatilit, i cili e ka pranuar ofertën e kompanisë Powow
Entertainment. Për detaje të tjera, kur do të vijë Unikkatil në
Prishtinë dhe kush tjetër do të performojë në këtë festival, do të bëhet
e ditur gjatë ditëve të ardhshme. Unikkatil konsiderohet si
njeriu që e ndryshoi rap skenën shqiptare. Karrierën muzikore e filloi
në vitin 2004, ndërsa pasi u zhvendos në Bronx të New York-ut e
intensifikoi përkushtimin e tij ndaj muzikës rap, duke qenë anëtar i
grupit A.B.I. (Albanian Boys Incorporated) dhe më vonë e krijoi grupin
T.B.A. (The Bloody Alboz) apo në shqip Shqipet e përgjakshme. Tekstet e
këngëve të tij shpeshherë janë ofenduese dhe me këtë ai përpos që ka
krijuar adhurues, në të njëjtën kohë ka krijuar edhe armiq, sidomos në
mesin e rap këngëtarëve. Deri më tani ka incizuar katër albume,
ndërsa me gjithë se ka pasur kërkesa të mëdha, ai asnjëherë nuk ka
mbajtur ndonjë koncert në Prishtinë. |
