 Zlatan Ibrahimoviq di të flas gjuhën e ëmbël shqipe! Superylli suedez
i Milanit, di shumë fjalë në gjuhën shqipe, fjalë me të cilat
nganjëherë komunikon me miqtë e tij shqiptarë. Njëri nga ta është edhe
talenti i ri kosovar i Malmos, Dardan Rexhepi.
Ky i fundit zbulon për
‘Sport’ se Ibra di t’i shqiptojë mjaft mirë disa fjalë në gjuhën shqipe.
"Ibrahimoviq di të flasë disa fjalë në gjuhën shqipe. Ai di të
komunikojë pak në shqip, di të flasë disa fjalë. Shpesh thotë:
‘Çka ka
për me hangër ?’. Qysh je?. Qa po bon?”, deklaroi duke qeshur Dardani.
"Ai i di disa fjalë sa për të bërë një bisedë të zakonshme.Ai e kupton
mjaft mirë shqipen. Ibra vjen nga një kanton në Suedi, ku ka shumë
emigrantë, ndër të cilët edhe shumë shqiptarë”, theksoi Rexhepi. Ibra
është rritur në Rosengard, vend ky afër Malmos, ku jetojnë edhe shumë
shqiptarë emigrantë. "Ai i do shqiptarët. Gjithashtu është një
futbollist me stil tipik shqiptar e ballkanik, për shkak të euforisë dhe
gjaknxehtësisë së tij”, u shpreh 19-vjeçari nga Kosova. Se Ibrahimoviq
është i afërt me futbollistët shqiptarë, e vërteton edhe miqësia e tij
me shumicën prej shqiptarëve që luajnë në Suedi. Dihet se Ibra ishte mik
mjaft i ngushtë me ish-mesfushorin kosovar të Malmos, Labinot Harbuzin,
ndërsa gjithashtu ka kontakte mjaft të mira me Agon Mehmetin e Emir
Bajramin. Madje për këtë të fundit ai ka vënë një nofkë. Ibra i
drejtohet Bajramit me fjalën ‘shqiptari’.
Ibrahimoviq vjen në Kosovë?
Ndonëse në shaka, Dardan Rexhepi deklaroi se me gjithë qejf do ta
sillte në Kosovë Zlatan Ibrahimoviqin. Sipas tij, kjo do të ishte një
marketing mjaft i mirë për shtetin e Kosovës. "Do të kisha shumë dëshirë
që ai të vinte këtu. Ndoshta do të kontaktojmë me të dhe do t’ia japim
këtë ide”, u shpreh Dardani. Ky i fundit deklaroi se kalon shumë kohë me
yllin e Milanit, i cili të gjitha lëndimet e tij i kuron në Malmo. "Ai
vjen shpesh në Malmo. Aty e ka mjekun personal, i cili është edhe mjek i
Malmos dhe i Përfaqësueses së Suedisë. Kaloj kohë me të. Ai më
këshillon shpesh për futbollin evropian dhe hapat që duhet t’i marrë”, u
shpreh Rexhepi. Dardani shihet si pasardhës i Ibrës në Suedi, ndërsa
tifozët e Malmos i kanë kushtuar atij një këngë. "Është një këngë me
melodi të muzikës suedeze, ndërsa aty përmendet emri im dhe i Zlatanit,
ndërsa bëhet ndërlidhja që unë jam pasardhësi i tij”, shpjegoi
19-vjeçari kosovar.
Udhëheqësi i tifozëve të Malmos, shqiptar
Dardani zbuloi se udhëheqësi i tifozerisë së flaktë të Malmos është
një shqiptar. Bëhet fjalë për Agron Hysenin, i cili drejton këtë
tifozeri tash e sa kohë. "Ai që udhëheq tifozët e Malmos është një
shqiptar. Quhet Agron Hyseni, ndërsa ai e di se edhe unë jam shqiptar.
Kështu, ai shpesh ma jep mua altoparlantin për t’i entuziazmuar tifozët
në maksimum gjatë ndeshjeve”, theksoi Dardani. Ky i fundit, gjithashtu
përkujtoi momentin kur festuan me qebapë titullin e fituar me Malmon në
vitin 2010. "Po është e vërtet. Ne kemi festuar me qebapë. Shkuam në një
restorant në Malmo bashkë me drejtuesit e skuadrës dhe ata na ofruan
peshk. Por, mua nuk më hahet shumë peshku dhe e pyeta kuzhinierin se
çfarë tjetër kishte në dispozicion. Ai tha se mund të na sillte mish
pule dhe qebapë. Pa hezitim, ne zgjodhëm qebapë. Ju e dini se ne
shqiptarët vetëm me këtë lloj ushqimi mund të ngopemi”, theksoi duke
qeshur Rexhepi. |
